Уйгу – быйаҥ ыһыаҕа

 

Түһүлгэҕэ тахсыаҕын,тойукпутун туойуоҕун,

Алгыспытын этиэҕин, тунах ыһыах ыһыаҕын!

 

 

Уйгу – быйаҥ ыһыаҕа…

Аан дойдуга төрүт омуктар тыллара, Россияҕа Театр, Саха сиригэр Сомоҕолоһуу сылыгар аналлаах ыам ыйын 31 күнүгэр  Саха омугун норуотун үгэстэрин  нөҥүө оҕону сиэр-майгы өттүнэн иитэр сыаллаах  Чурапчы эбэ кэрэ сиригэр, Имигиттэ алааһыгар үтүө үгэскэ кубулуйбут самаан сайыны уруйдуур оскуола оҕолорун ыһыаҕа буолан ааста.

Хайа баҕар ыһыах ыраастаныыттан, арчыланыыттан саҕаланар. Ол курдук Кузьмина Акулина Николаевна алгыстаах тылынан ыһыах кыттааччыларын арчылаата. Онтон аал-уоту аһатар сиэри-туому Монастырев Николай Николаевич Имигиттэ ытык сирин арыылаах алаадьынан, сыалаах саламаатынан күндүлээн ыһыахпытын арыйда. Ол кэннэ ыһыах үөрүүлээх чааһыгар  2018-2019 үөрэх дьылын түмүгүнэн үөрэххэ, спортка, общественнай үлэҕэ ситиһиилээхтэри, үрдүк көрдөрүүлээх оҕолорго анал ааттар иҥэриннилэр. Ол курдук алын сүһүөхтэргэ  Сыл бастыҥ үөрэнээччитинэн буолла Гуляев Айсен, 4 кылаас үөрэнээччитэ, орто сүһүөхтэргэ Кривошапкина Карина, 5 а кылаас үөрэнээччитэ, улахан кылаастарга 8 а  кылаас үөрэнээччитэ Пестерев Айтал “Сыл бастыҥ үөрэнээччитэ” ааты ыллылар. “Сыл бастыҥ общественнига” ааты  Рожина Саша, 4 кылаас үөрэнээччитэ, 5 б кылаастан Колесова Алгыстана, 8 а кылаастан Федотов Ваня буоллулар. Спортка “Сыл бастыҥ спортсмена” ааты ыллылар:  дуобатка Титов Архан, көҥүл тустууга Ленский Андриан, волейболга  Оконешников Вадим, сүүрүүгэ Мохначевский Данил, буулдьанан ытыыга Ефимова Сайаана, оҕунан ытыыга Степанова Эля, ыстаҥаҕа Ефимова Айаана.

Ыһыахха оҕолор да, учууталлар да, төрөппүттэр  бары биир киһи курдук 100% сахалыы таҥастаах кэлбиттэрэ көрөргө да учугэйэ, онтон ыһыах таһыма үрдүүрэ биллэр суол. Ыһыахпыт эмиэ биир үтүө үгэһэ буолбут остолобуой үлэһиттэрэ ыһыахха кэлбит дьоҥҥо анаан саламаат, үтэһэлээх эт, ис миинэ бэлэмнээн күндүлүүллэрэ олус хайҕабыллаах.
Ыһыахха эҥин араас кылааһынан күрэхтэһиилэр ыытыннылар. Ол курдук Бастыҥ ураһаны көрүүгэ 6 кылаастарга тэҥнээх ким да суох буолла, онтон улахан кылаастарга 10 кылаастар бастыҥ ураһа аатын ыллылар. “Сомоҕолоһуу” айар күрэххэ 10  кылаастар нуучча норуотун сүрдээх тиийимтиэтик, интириэһинэйдик көрдөрөн, туруоруу ис хоһоонун арыйан биллэн турар бастаатылар. Араас норуоттар төрүт таҥастарын көрөр күрэххэ бастыҥ кылаас 5 а, 10 а кылаас буоллулар.  “Норуот быстыспат ситимэ” диэн дьиэ кэргэн күрэҕэр 7б кылаастан Соловьевтар дьиэ кэргэн сахалыы туттар малы-салы быстыбат ситим оҥороннор дьону-сэргэни кэрэхсэтэн кыайыылаах аатын ыллылар. Улахан кылаастарга 10б кылаастан Оконешниковтар дьиэ кэргэн Билгэлээх сувенирдара кыайыылаах таҕыста.  Оһуохай күрэҕэр кыраларга 7б кылаастар, улахаттарга 8а кылаастар бастыҥтан бастыҥ буоллулар.

Ыһыахха сылы быһа ыытыллыбыт САХА-СПАРТ түмүгүн таһаарыыта барыларын долгутара. Ол курдук  2018-2019 үөрэх дьылын түмүгүнэн 5-8 кылаастарга 3 миэстэ буолла 6а кылаас коллектива (Бродникова Нь.К., Саввина А.А.), 2 миэстэ 5а кылаас коллектива (Назарова Н.П., Кривошапкина Е.Ф.) уонна муҥутуур кыайыылааҕынан таҕыста 6б  кылаас коллектива (Винокурова С.Г., Марков А.Е.).  Улахан кылаастарга 3 миэстэ 11а  кылаас коллектива (Шестакова З.А., Максимова А.Н.), 2 миэстэ 10 а кылаас коллектива (Постникова И.М., Кузьмина Е.В.) уонна 1 миэстэ 10б кылаас коллектива (Егорова М.А., Захарова Нь.П.) буоллулар.

Хас биирдии ыһыахха былыр-былыргыттан күүстээхтэн–күүстээхтэр кэлэннэр күүстэрин-уохтарын тургутан көрөллөр. Биһиги ыһыахпыт эмиэ спортивнай түһүмэҕэ суох ааспат. Ол курдук мас тардыһыыга, хапсаҕайга уолаттар да, кыргыттар да бэйэлэрин кыахтарын тэҥнэстилэр. Кыайбыттары үгэс быһыытынан дьиҥ сахалыы мүһэлэринэн наҕараадалаатылар.

Саамай кэтэһиилээх – манаһыылаах ыһыаҕы түмүктүүр лотерея буолан ааста. Быйылгы сүрүн бириис, скоростной билисипиэт 5б кылааһын үөрэнээччитигэр Пинигин Эрикка барда.

Ыһыахпыт быйылгы уратытынан буолла курулаччы түспүт этиҥнээх ардах быстах түһэн ааһан ыһыахха кэлбит дьону “ыраастаан”, уйгу-быйаҥ сайына кэлэр буолла диэн үөрдэ-көтүттэ, санаабытын көтөхтө!

 

Нуучча тылын уонна саха тылын МОтун холбоһуктара.

Ыһыах сайтка

Добавить комментарий