Улуустааҕы семинар

Ахсынньы 14 күнүгэр А.П. Илларионов аатынан Хайахсыт орто оскуолатыгар алын сүһүөх учууталларыгар аналлаах  “Системно-деятельностный подход как основа современного урока” диэн темаҕа улуустааҕы семинар ыытылынна. Семинарга Хайахсыт, Мырыла, Арыылаах, Дириҥ, Хадаар уонна Чурапчы нэһилиэгин улахан оскуолаларыттан, барыта 30-ча буолан кыттыыны ыллыбыт.

Семинары Хайахсыт орто оскуолатын директора Борисов Федор Игнатьевич  үөрүүлээхтик арыйда уонна кэлбит ыалдьыттарга ситиһиини баҕарда. Чурапчы улууһун Үөрэх управлениетыттан алын сүһүөх үөрэхтээһинин сүрүннээччи Алексеева Саргылаана Егоровна  уонна Чурапчы улууһун алын кылаастар методическай холбоһуктарын салайааччыта, С.А.Новгородов аатынан Дархан Кыһатын алын кылаас учуутала, Саха республикатын үөрэҕириитин туйгуна Максимова Луиза Егоровна кыттыыны ыллылар, семинар ситиһиилээхтик барарыгар үтүө тылларын эттилэр.

Күн  бастакы аҥарыгар  Хайахсыт оскуолатын алын кылаас учууталларын олус интэриэһинэй, аныгы ирдэбилгэ толору эппиэттиир, сэргэх, аһаҕас уруоктарын көрдүбүт. Барыта үс уруок ыытылынна. Азбука – 1 кылааска, Тулалыыр эйгэ – 2 кылааска уонна Саха тылыгар 4 кылаастарга ыытылынна. Уруоктар кэннилэриттэн тута уруоктары  анаалыстааһын буолла.

Эбиэт кэннэ, күн иккис аҥарыгар Саха республикатын үөрэҕириитин Үтүөлээх үлэһитэ, Саха республикатын үөрэхтээһинин туйгуна, республикабытыгар биир тарбахха баттанар практик-учуутал, Никифорова Наталья Афанасьевна бэйэтинэн кэлэн мастер-класс ыытта уонна аныгы уруок тутула хайдах буолуохтааҕын,  оҕолору интэриэһиргэтэр, күннээҕи уруокка туттуллар араас ньымаларын, бэйэтин баай уопутуттан кэпсээн, ыыппыт уруоктарын видеоматериалын  көрдөрөн, сиһилии быһаарда, ырытта, санаатын үллэһиннэ. 

Түмүккэ, семинарга кэлбит учууталлар үгүс саҥаны биллибит-көрдүбүт, иһиттибит диэн астынан, семинар үрдүк таһымҥа буолла диэн бэлиэтээн махтал тылларын эттилэр уонна кыттыыны ылбыт  коллегаларга барыларыгар сертификат туттарылынна. Маннык семинардар өссө да ыытылла туралларыгар баҕардыбыт уонна аныгылыы тупсаҕай оҥоһуулаах саҥа Хайахсыт оскуолатын бүтүн коллективыгар махтанныбыт, үрдүк ситиһиилэри, айымньылаах үлэни баҕардыбыт.

Сысолятина Евдокия Климовна, алын кылаастар методическай холбоһуктарын салайааччыта.