Педагогический десант

Тохсунньу 16 күнүгэр Д.П.Коркин аатынан Чурапчытааҕы оҕо спортивнай оскуолатын администрацията, педколлектива,үлэһиттэрэ, барыта холбоон 32 буолан саха тылдьытын авторын, саха фольклорун уонна этнографиятын чинчийээччитэ, “Сибиряковскай экспедиция” кыттыылааҕа Эдуард Карлович Пекарскай аатынан Игидэй орто оскуолатыгар ыалдьыттаан кэллэ. Бу сырыы сүрүн сыалынан Игидэй орто оскуолатыгар быйылгы үөрэхтээһин сылыгар киирбит саҥа “ГЛОЛАЙМ-Школа” систематынан оскуола буфетыгар оҕолору хайдах аһаталларын, прототипирование уонна ментальнай математикаҕа оҕолору үөрэтиини көрүү буолар. Олохтоох оскуола коллектива, саха киһитин сиэринэн, кэлбит ыалдьыттары итии үүттээх чэйдээх минньигэс остуолунан көрүстүлэр. Салгыы оскуола библиотекатыгар көрсүһүү буолла, ол кэнниттэн кабинеттарынан тарҕаһан аһаҕас уруоктарга сырыттыбыт. Э.К.Пекарскай аатынан Игидэй орто оскуолатын директора Лопатин Виктор Васильевич, кэлэр үөрэх сылыгар оскуолалара 100 сааһын бэлиэтээри олороллорун, үөрэх хайысхаларын, “Куолу” диэн араатардар күрэхтэрин, математикаҕа ментальнай математика диэни саҕалаабыттарын, спорт өттүгэр хайыһар күрэхтэһиилэрин, Сындыыс хайыһар куруһуогун (сал.Оросин С.Е.), оскуола коллективын туһунан ис иһиттэн иэйэн туран кэпсээтэ. Оскуола баай историятын арыйар элбэх сыллаах үлэни түмэн кинигэ оҥоро сылдьаллар. Бастакы Сырдык санаа кыһата диэн кинигэ 2007 сыллаахха тахсыбыт. Аны күһүн үбүлүөйү көрсө иккис кинигэ тахсыахтаах.
Опыттаах педагог – психолог Айталина Эдуардовна Аргунова ыытар үлэтин кытары билистибит. Бу саас хайыһарга улахан республиканскай күрэхтэһии ыытыллара күүтүллэр. Игидэй хайыһардыыр сирэ Олимпийскай суол диэн ааттыыллар эбит. Хайыһар трассатын оҥорууга энтузиаст – педагог Оросин С.Е. бэйэтин күүстээх баҕатынан оҥорор.
Оскуола оҕотун ахсаана 127. Барыта 26 учуутал үлэлиир. Диреторы үөрэх чааһыгар солбуйааччы Пахомова С.С. хас да сылын айымньылаахтык үлэлиир. Саас таас оскуола сваята түһүөхтээх. Онон Игидэй оскуолата олус айымньылаахтык, таһаарыылаахтык үлэлии олорорун көрөн – истэн кэллибит.
Салҕыы бу соторутааҕыта 125 сааһын туолбут Тихон Михайлович Каженкин аатынан Арыылаах орто оскуолатыгар ыалдьыттаан аастыбыт.
Айаммыт салҕыы Афанасий Акимович Макаров аатынан Улахан – Күөл оскуола – оҕо саада үөрүүлээхтик аһыллыытыгар кыттыыны ыллыбыт. Бу дьаһалга Сахабыт Республикатын Ил Дархана Егор Афанасьевич Борисов, суол, тутуу, мелиорация, сибээс, ОДЬКХ миниистирдэрэ, солбуйааччылара кэлэн ыалдьыттаан алгыс тылларын этэн бардылар. Саҥа оскуола – саад аныгылыы тупсаҕайдык оҥоһуллубутун, сахалыы дизайнын сөхтүбүт.
Дойдубутугар айаннаан иһэн профессор Георгий Прокопьевич Башарин аатынан Сылан орто оскуолатыгар таарыйан аастыбыт. Бу икки мэндиэмэннээх, сырдык, таас оскуола икки сыллааҕыта саҥа үлэҕэ киирэн киһи сэргии көрөрө элбэх. Үлэтин хайысхата уратыта – биология, химия предметтэрин дириҥэтэн үөрэтэр.
Сылдьыбыт оскуолаларбыт салайааччыларыгар,коллективтарыгар, бу айаны тэрийбит бэйэбит оскуолабыт салалтатыгар (директор Гуляев Н.Н.), сымнаҕас айаннаах суоппардарбытыгар барҕа махталбытын тиэрдэбит! Таһаарыылаах, айымньылаах үлэни, кытаанах доруобуйаны баҕарабыт!